النهارده واحنا قدام بوابه الجامعه فى وقفه للمطالبه بالافراج عن زمايلنا المعتقلين فى احداث العباسيه ,واحد من الشرطه العسكريه معرفش رتبته ايه بتلات نجوم ونسر بيقولى اللى بتعملوه ده ملوش لازمه احنا لو عايزين حاجه هنعملها .
انا : زى ايه مثلا .
الرتبه : زى اى حاجه ممكن تتخيلها وبلاش نتكلم لان انا اصلا هنا بحميكم وممكن اسيب عليكم دلوقت الاهالى وساعتها برده هتقولوا الجيش محمناش ليه
انا : طيب مانتو عملتو كده اول امبارح والبلطجيه كانوا بيدبحوا فى المعتصمين ومفيش ولا واحد منكم اتحرك , انتو كنتو فين وبتعملوا ايه ؟
الرتبه : كنا بنأمن مبنى وزاره الدفاع .
انا : يعنى مبنى وزاره الدفاع اللى المعتصمين كانوا بعيد عنه بمسافه حوالى كيلو اهم من الناس اللى البلطجيه كانو بيدبحوهم , اللى اساسا البلطجيه متصورين واقفين مع بتوع الامن المركزى ونازلين من عربيات الشرطه العسكريه
الرتبه ( وشه كان احمر وحسيت ان العساكر هيشدونى من قدامه ) : تعالى يابنى هنا ( طبعا هو اكيد كان فاكر انى هخاف منه وامشى ) "رحتله وقربت منه" : انت يابنى عندك كام سنه ؟
انا : عندى 23 سنه
الرتبه : يعنى لو اتجوزت بدرى شويه كنت جبت قدك , يابنى روح ع جامعتك واقعد على كتابك وذاكر وملكش دعوه باللى هيحصل فى البلد ( مع زقه عنيفه شويه ).
انا : مش هيحصل فى البلد اكتر من اللى حصل
الرتبه : يابنى لو ع السلطه احنا مش عايزينها وعايزين نسلمها من سنه ونص , اصبر شهر انت تحت ظلم بقالك ستين سنه
انا : وايه اللى منعكم تسلموها
الرتبه : مجلس الشعب بتاعكم اللى انتو انتخبتوه احنا مشينا على المسار اللى قالوا عليه , ومتسألنيش على حاجه , مش هو ده مجلس الشعب بتاع قانون مضاجعه الزوجه والخلع والختان والقوانين اللى بنسمعها
انا ( رغم اختلافى مع اغلبيه البرلمان ) : وبرده مجلس الشعب ده بتاع سحب الثقه من حكومه الجنزورى اللى انتو مصرين عليه , وقانون العزل اللى كان ليكم تدخل فى عدم تنفيذه
.
الرتبه : على فكره انتو مينفعش معاكم اللى يتعامل بالحسنى , مينفعش معاكم غير الاحكام العسكريه وبالنسبه للعيال اللى انت بتطالب بالافراج عنهم , احنا مش بنظلم حد اللى متصور هيتحاكم واللى مش هيتثبت عليه حاجه هنطلعه .
انا : وبالنسبه للبلطجيه اللى اتصوروا بيدبحوا المعتصمين والناس جابت اسمائهم وبعتنهالكم ومفيش ولا واحد منهم اتقبض عليه ده دليل ان فى حد موجههم.
الرتبه : احنا مش هنحكى كتير , يلا يابنى عشان انا مش فاضى واحمد ربنا انى بتعامل معاك كواحد مضحوك عليه , وروح اشتم فينا براحتك .
عسكرى شدنى بعيد عنه وانتهى النقاش بدون نتيجه , وزمايلنا لسه برده مش عارفين مصيرهم ايه